Mumbai – Sapno Ka Shehar

Mumbai… sapno ka shehar. Ek aisa shehar jo kabhi sota nahi.
Jo bhi yahan apne sapne poore karne aata hai, yeh shehar uski mehnat ki kathin pariksha leta hai. Jo jitna struggle karta hai, Mumbai use utni hi unchai tak le jaati hai. Aur jo haar maan lete hain, ya to shehar chhod dete hain, ya phir yahin rehkar roz apni khuli aur band aankhon mein apne tootte sapne dekhte rehte hain.

Isi shehar mein ek ladki thi, jisne bahut chhoti umar se mehnat ki thi. Aaj uski company duniya ki top 10 jewellery design aur manufacturing companies mein number 1 banne ja rahi thi. Ab yeh sirf ek company nahi rahi thi, balki ek brand ban chuki thi.

Aur us brand ka naam har kisi ki zubaan par tha— Parvati Jewellery.

Aur yeh brand kisi aur ka nahi, hamari pyaari Khushi ka tha.

Khushi sirf 25 saal ki thi. Behad khoobsurat. Doodh jaisi gori skin, hazel green aankhein, aur lambe ghane baal jo kamar se neeche tak aate the.
Uski smile aisi thi jaise kisi ka bhi dil chhoo le. Jo ek baar use muskuraate dekh le, bina pyaar kiye reh hi nahi sakta.

Lekin shayad yahi pyaar uski kismat mein poori tarah likha nahi tha.

Khushi jab sirf 12 saal ki thi, tab ek bhayanak road accident mein usne apne maa-baap dono ko kho diya.

Uske papa, Shiv Sharma, ek mashhoor jewellery designer the. Unhone apni wife Parvati ke naam par hi “Parvati Jewellery” start ki thi. Mehnat aur talent ke dum par kuch hi saalon mein company ne zabardast naam aur profit kama liya.

Aur tabhi unki zindagi mein sabse badi khushi aayi—
unki beti, Khushi.

Kehte hain na, jab zindagi mein bahut zyada khushiyan aa jaati hain, to nazar lag hi jaati hai.
Waisa hi kuch Shiv, Parvati aur Khushi ki zindagi mein bhi hua.

Ek din Shiv ka chhota bhai Shekhar apne parivaar ke saath unke ghar aa gaya. Apni dukh bhari kahaniyan suna kar usne Shiv ka dil pighla diya. Shiv ne apne bhai Shekhar, uski wife Suman, aur beti Nidhi ko apne saath hi rakh liya.

Waqt beetta gaya… aur phir ek aisi manhoos, toofani raat aayi,
jahan sadak par hui ek ghatna ne sab kuch chheen liya.

Us raat Shiv aur Parvati is duniya se hamesha ke liye chale gaye.
Aur andhere mein reh gayi chhoti si Khushi — zinda, lekin bilkul akeli..

Unke jaane ke baad Parvati Jewellery Khushi ke naam ho gayi.
Lekin Shiv ki will mein ek shart thi—

Khushi ko 25 saal ki umar se pehle shaadi karni hogi.
Shaadi ke baad company pehle uske husband ke naam hogi, aur shaadi ke ek hafte ke andar hi husband ko company wapas Khushi ke naam transfer karni hogi.
Agar 25 saal se pehle Khushi ko kuch ho jaata, to saari property trust ke paas chali jaati.

Jab tak Khushi ko poori tarah se company nahi milti, tab tak uske chacha Shekhar hi property ke guardian the.

Aur aaj…
Khushi ke 25 saal poore hone mein sirf ek din baaki tha.
Aur aaj hi uski shaadi bhi thi.

Is khaas mauke ke liye Mumbai ka luxurious Blue Moon Hotel book kiya gaya tha.

Khushi apne room mein dulhan ke jode mein taiyaar baithi thi. Aaine ke saamne poori tarah ready… lekin aankhon se aansu rukne ka naam nahi le rahe the.

Rote hue woh mann hi mann boli—
“Mom… Dad… dekhiye, aaj aapki beti dulhan ban gayi.
Chacha ji ne mere liye dulha bhi choose kar liya hai.
Aaj woh mujhe lene aane wale hain.

Aman bahut ache hain… mujhse bahut pyaar karte hain, mera bahut khayal rakhte hain. Aur… shayad main bhi ab unse pyaar karne lagi hoon.”

Woh apne maa-baap ko yaad kar hi rahi thi ki achanak room ke bahar se kuch awaaz aayi. Uska dhyaan toot gaya.

Woh bed se uthi aur bahar aakar dekha. Lekin wahan koi nahi tha.
Na koi gira hua samaan, na koi hulchul.

“Shayad mera hi waham hoga,” usne khud se kaha.

Phir use yaad aaya—Nidhi ab tak usse milne kyun nahi aayi?

“Chal kar dekhti hoon, woh apne room mein hai ya nahi.”

Bhaari lehenga sambhalte hue Khushi, Nidhi ke room ki taraf badhi.
Jaise hi usne knock karne ke liye haath uthaya, darwaza apne aap khul gaya.

Khushi thodi ghabra gayi, lekin dheere-dheere andar chali gayi.

Tabhi bedroom se wahi ajeeb si awaaz phir sunai di.
Khushi ke kadam apne aap slow ho gaye.

Woh chupchaap bedroom ke darwaze tak pahunchi.
Darwaza aadha khula hua tha.

Aur andar jo usne dekha…
woh uski zindagi ka sabse bada jhatka tha.

Bed par Aman aur Nidhi ek-doosre ki baahon mein the. Uski aankhon ke saamne — Aman aur Nidhi ek-doosre ko poore passionisted ke saath ek dusre ko kiss kar raha tha..

Usi pal… Khushi ki saansein jaise tham si gayi.

Mano woh saans lena hi bhool gayi ho. Uska dil kaanch ki tarah toot kar seene mein bikhar gaya.

Aankhon se aansuon ki dhaar behne lagi, lekin woh hil bhi nahi pa rahi thi.

Jo kuch woh apni aankhon ke saamne dekh rahi thi,us par use khud yakeen nahi ho raha tha.

Ek pal ke liye uske dil ne usse kaha— “Shayad yeh koi bura sapna hai…

shayad main sapna dekh rahi hoon.”

Lekin tabhi Nidhi ki awaaz uske kaanon tak pahunchi… aur uska dil ek baar phir berahmi se toot gaya.

Nidhi ne Aman ko kiss karte hue kaha—“Aman, mujhse ab aur intezaar nahi hota. Kab tum us manhoos aur bewakoof didi ko hamari zindagi se hamesha ke liye hataoge?”

Phir zehar bhari muskaan ke saath boli— “Shaadi ke baad saari property apne naam kar lena. Uske baad use jaan se maar dena. Phir hum hamesha ke liye saath rahenge.”

Yeh sunkar Aman hans pada. Usne Nidhi ko phir se kiss kiya aur bola—

“Isi property ke liye to main us bewakoof Khushi se pyaar ka natak kar raha hoon. Itni khoobsurat hai, phir bhi khud ko chhoone tak nahi deti. Pata nahi apni khoobsurti par itna ghamand kahan se laati hai.”

Har ek lafz Khushi ke seene mein chhure ki tarah chubh raha tha.

Ab wahan khade rehna uske liye naamumkin ho gaya. Uske pair ladkhada gaye.

Lekin kisi tarah khud ko sambhalte hue woh chupchaap Nidhi ke room se bahar nikli aur apne room ki taraf badhne lagi.

Tabhi uske kaanon mein Suman ki awaaz padi. Khushi darwaaze ke paas hi thithak gayi.

Suman, Shekhar se keh rahi thi—“Kab tak is property ke liye us ladki ki dekhbhaal karte rahenge? Agar pehle pata hota, to Shiv aur Parvati ko maarne ke bajaye usi ladki ko maar dete.”

Kadwahat bhari hasi ke saath woh aage boli— “Beti ki maut ke baad woh dono khud hi saari property hamare naam kar dete.Lekin thodi si galti ho gayi.”

Shekhar ne thande swar mein kaha—“Bas kuch hi din aur, Suman. Shaadi ke baad Aman use maar hi dega. Abhi uske saamnewaisa hi behave karo jaise ab tak karte aaye ho.”

Yeh sab sunkar Khushi ki poori duniya ujad gayi.

Aaj uski shaadi thi… aur aaj hi uska har bharosa bhi toot gaya. Rote hue, bikhre hue dil ke saath Khushi apne room mein laut aayi. Ab woh sirf ek tooti hui dulhan nahi thi— woh ek aisi ladki ban chuki thi,jiske saamne uski zindagi ka sabse khaufnaak sach khada tha.